छात्रालाई एसिड हान्ने अभियुक्त पक्राउ, आजै सार्वजनिक गरिने

काठमाडौं : एसएलसीको ट्युशन पढ्न गएका दुई छात्रामाथि एसिड प्रहार गर्ने युवकलाई प्रहरीले पक्राउ गरेको छ। प्रहरीको विशेष टोलीले तीन साता लामो अनुसन्धानपछि पक्राउ गरेको हो ।प्रहरीले घटना र पक्राउ परेका अभियुक्तबारे सार्वजनिक गर्न आजै पत्रकार सम्मेलनको आयोजना गरेको छ।


गत फागुन १० गते राजधानीको केन्द्र बशन्तपुरस्थित एक ट्युशन सेन्टरमा पढ्दै गरेका सिमा बस्नेत र संगिता मगरलाई एसिड प्रहार गरी घाइते बनाइएको थियो । दुवैको अहिले अस्पतालमा उपचार भइरहेको छ। एसिड प्रहारबाट घाइते सीमाले बुधबार प्रधानमन्त्रीलाई चार पृष्‍ठ लामाे पत्र लेख्दै अभियुक्तलाई पक्राउ गरी फाँसी दिन माग गरेकी थिइन् ।


एसिड प्रहार गर्ने अभियुक्तलाई पक्राउ गर्न नसकेको भन्दै सरकार तथा प्रहरीको संसदीय समिति तथा नागरिक समाजबाट कडा आलोचना भएको थियो । एसिड घटनाबारे अनुसन्धान गर्न एसपी मिरा चौधरीको संयोजकत्वमा छानबिन समिति गठन गरेको थियो।
Source-annapurnapost.com